O luxo de tomarnos a vida máis amodo

O noso día a día foise acelerando a medida que pasan os anos. As rutinas víronse reinventadas polas novas tecnoloxías, interpretamos cantidades inxentes de información sen o tempo necesario para comprendela. Corremos de un lado a outro sen gozar de onde estamos e comemos sen saborear os pratos que probamos. Esta frenética tendencia provocou a aparición dun novo estilo de vida, o movemento Slow.

Con este movemento xurdiu unha nova forma de pensar o turismo, o Slow Travel como contraposición ao turismo de masas. Esta idea orixinouse en Italia, como unha sección do movemento slow food. Os italianos reivindicaban xa nos anos 80 a gastronomía local fronte á cultura fast-food. E así, esta idea foise adaptando ao mundo do turismo. O turismo lento rompe moitos moldes impostos polas axencias de viaxes, propón pequenas cidades fronte ás capitais mundiais, culturas locais fronte a cultura uniformada, improvisación fronte a paquetes e integración fronte a contemplación. 

Algunhas das  claves do turismo slow son:

• Os destinos non son grandes centros turísticos saturados, senón todo o contrario.
• A estancia ten que ser polo menos de unha semana. É necesario o tempo para coñecer o atractivo da zona. 
• O aloxamento escollido é sinxelo.
• As actividades do turista slow están orientadas a coñecer o destino pero tamén a relacionarse coa xente da localidade. 
• O viaxeiro de este tipo de turismo é respectuoso co entorno de acollida.

Para considerar que un lugar é un destino slow débese asumir unha serie de compromisos concretos: incentivar a agricultura, gastronomía e o comercio local, recuperación de zonas monumentais e centros históricos e non superar os 50.000 habitantes, garantindo así a calidade.

Para acceder ao turismo slow non temos que escaparnos moi lonxe, estou segura de que hai millóns de lugares en Galicia que aínda non coñecedes. A páxina web do Turismo Slow Norte de Galicia  ofrécenos vivencias únicas en diferentes destinos con encanto. Animariádesvos a vivir esta nova experiencia? 

Un post de Carla Río Vea

• FONTES DE INFORMACIÓN:

Turismo Slow Norte de Galicia, dispoñible en liña en: 
http://turismoslow.gal/ [Consulta: 29 de novembro de 2017]
Hosteltur, dispoñible en liña en:  
https://www.hosteltur.com/123596_turismo-slow-alternativa-vacaciones-masificadas.html [Consulta: 28 de novembro de 2017]
20 minutos, dispoñible en liña en:
http://www.20minutos.es/noticia/1038578/0/turismo/lento/calidad/ [Consulta: 28 de novembro de 2017]
Territorio, dispoñible en liña en:
http://territorio.es/el-modelo-slow-tourism-de-nueva-zelanda/ [Consulta: 28 de novembro de 2017]
Ocio dinámico, dispoñible en liña en: 
http://www.ociodinamico.es/articulos_turismo_innovacion_competitividad/slow_travel_el_arte_de_viajar-con_calma.html  [Consulta: 29 de novembro de 2017]